意外地，呢個lunch set還算好食。 一直都好少食”千兩”。一嚟覺得佢只係貴價版元氣，二嚟附近有同類型選擇。今次誤打誤撞嚟咗食假日lunch。 Lunch set好多選擇，今次揀了刺身丼和滑蛋吉豬set，Set會包飯，湯，前菜同小甜品。由於而家做緊恒生信用卡500減80，所以額外叫了幾個串燒。 刺身丼靚靚仔仔，食落都還可以，但係刺身嘅質素稍為不及附近嘅”穴”系列餐廳。至於吉列豬扒係驚人地好食，炸得夠鬆化，肉夠晒厚但好腍，中間夾雜肥肉，係非常邪惡嘅油份！其他串燒水準好高，甚至高過穴。牛舌好明顯係切啲靚啲嘅位置，雞頸肉非常香口，雞翼同雞髀都夠大嚿有水準。 真係不能睇少連鎖餐廳可以做到嘅性價比。 #將軍澳美食 #hkfoodies #afterteaandwine #茶餘酒後
一直以為”やき肉”(Yakiniku)是燒肉like集團，原來唔係，而且得深水埗同將軍澳有分店。 不過同燒肉like類似，やき肉同樣係平價燒肉，用平板落單，而且有好多一人位，就算一人嚟到都唔會尷尬。 不過今次三個人食，可以每種肉都試啲。牛有分牛五花、牛小排、牛板腱，豬同雞就各一種，另有牛舌、壺漬肉等等。睇番menu，大致上都係200-300g肉連小食、飯同湯，有個別set會有更多肉。個人食300g已經食到勁飽。 其實肉嘅質素就普普通通，倒是蒜蓉汁同辣醬襯得幾好食。牛五花雖然肥但係食落比預期中好，牛小排就真係好食啲，牛舌就普通啦，放題料。價錢就好合理，300g肉set普遍都係100鬆啲，平日更有白飯任裝。 難怪而家啲一人平價燒肉店一街都係。 #將軍澳美食 #hkfoodies #afterteaandwine #茶餘酒後
喺黃埔搵台灣嘢，”九份飽"係ok嘅選擇。 講ok，唔係因為佢嘅滷肉飯有咩問題。實際上佢嘅滷肉飯算係幾好食，個人認為係接近阿元水平，當然未去到台灣當地嘅名店咁好食啦，不過細碗35蚊大碗45 蚊係可以嘅，滷肉粒肥瘦均勻，相當不錯。 問題出喺另一熱門嘅鹽酥雞上面。我哋二人食，二人都食到佢有洗潔精味，可能今日失手？齋講炸係炸得唔錯，而且份量幾多。雙重芝士蛋餅就正正常常，但頭尾部分會少咗啲餡咁。 佢嘅抵食仲體現喺餐飲，主菜加10蚊就有包括凍菠蘿紅茶做餐飲了。另外，雖然睇落逼迫結結,坐埋牆的話都還算舒服。 #黃埔美食 #hkfoodies #afterteaandwine #茶餘酒後
母親節活動，又係自助餐。 假日午餐，大約每位300多，佐敦恒豐酒店嘅”紅煙窗”算幾多嘢食。最signature嘅有長腳蟹、愛爾蘭生蠔、刺身、鵝肝、即煮喇沙、牛羊扒、即整pancake等等。 長腳蟹唔會過咸，同生蠔同樣夠凍，生蠔水準一般，刺身不錯，意外地壽司都唔太差。Parma ham幾好食，夠咸又夠質感。喇沙好香，可以一試，鵝肝偏細但以這個價錢已經可以。其他熱盤則普普通通。中湯胡椒豬肚、西湯龍蝦湯，同樣不俗。 即整pancake就幾好食，另有機整嘅pancake，豆腐花、tiramisu等，雪糕居然同時有Movenpick同Haagen Dazs。而最令人驚喜係包飲品，而且幾多選擇，連菜蜜、柑桔檸檬都有。 同最近食嘅隔離”倚窗閣”比，”紅煙窗”質素稍高，而且有啲靚嘅六人座，望落高級少少。 #佐敦美食 #hkfoodies #afterteaandwine #茶餘酒後
上次食Hama食到一肚氣，要食”壽司郎”報仇。 雖然而家分店多咗，少咗人食，要喺假日食壽司郎，仲係需要擺啲心機。以將軍澳區為例，三間分店都係十一點前入座唔使排隊，一遲過十一點要等嘅枱號就會開始以幾何級數上升。 今日試咗中拖羅，大帆立貝，和牛等等。其實質素上壽司郎的確比同價壽司店穩定，起碼比較少出現岩巉肉酸嘅外形，亦都比較少有唔新鮮有酸餿味嘅情況。不過，唔係每次佢嘅推廣物都會好食，例如和牛食落怪怪的，XO醬亦都冇提升到壽司嘅味道。反而大赤背就相當高質，非一般壽司店可比。 其實個人係希望有啲競爭對手可以抗衡壽司郎，唯有係咁樣，佢先可以keep住個質素。 #將軍澳美食 #hkfoodies #afterteaandwine #茶餘酒後
又去新都城，今次去”金鳳大餐廳”。 餐廳名好似茶記，其實係類似”花園餐廳”、”扒王之王”、”哥登堡”咁，以食港式扒為主。咁當然會有大量差唔多樣嘅set，而午餐set係明顯比較平的。 舉例，今次叫的午餐set鐵板牛扒帶子，正常食要170多，但午餐只要148。帶子鮮嫩有彈性，牛扒就過熟(叫5成嚟到差唔多well done)，但肉質不錯，起碼不是用梳打粉”拿”到爛晒嘅牛肉，係真係似一塊平時買到嘅西冷。 另一份叫咗main Menu上面嘅牛柳餐。牛柳無論肉質同味道都喺西冷之上，但就冇咗西冷嘅油脂感。而配以佢嘅黑椒汁，表現甚至好過佢嘅蒜蓉汁。 餐包同餐湯就好Standard ，所有set都會包。最後要留意餐飲凍飲唔使加錢，所以都會盡量叫凍飲😅。 #將軍澳美食 #hkfoodies #afterteaandwine #茶餘酒後
假日突然間想食新加坡菜，搭幾個站去新都城食”蒲羅”。 喺度食午餐一啲都唔貴，一個set可以5x就落樓。另外可以平價加啲小食，例如鹹蛋魚皮只係22。 海南雞飯拼喇沙 - 以為會好Heavy原來又唔係，海南雞加咗甜豉油就幾好食。都係嗰句，新加坡式嘅海南雞飯先會有甜豉油。唔好再問點解泰式嘅冇了。喇沙就正常。 蒲羅蝦麵 - 幾好食，兩種麵線拼埋一齊，屋企人好鍾意。 鹹蛋魚皮 - 係就係平，但凍嘅，幾失望 咖央多士 - 唔夠熱，但味道搭救，幾好食，又唔會好膩。 最後嗰個雞翼清湯河，好明顯係偏食嘅屋企人叫”全走”嘅效果😂😂，原本應該係靚仔好多。 #將軍澳美食 #hkfoodies #afterteaandwine #茶餘酒後
還記得，當年有第一間”天丼”時，我覺得好貴。所以之前淨係食過東港城分店，今次就嚟到紅磡。 時至今日，一個天丼set，由幾十蚊到百幾蚊都有，唔知點解而家睇返，覺得一啲都唔貴。 一個set，有廣島蠔鮑魚鰻魚虎蝦同其他蔬菜嘅天婦羅set，連冷烏冬，盛惠156。至於另一個有兩種帆立貝赤鯛虎蝦蔬菜嘅天婦羅set，連冷蕎麥麵，盛惠148。 天婦羅嘅質素幾高。要講多次，天婦羅並唔係用純炸嘅方式整熟啲食材，而係用炸完嘅外層炸粉嘅熱力慢慢整熟啲食材，所以理論上入邊啲食材係新鮮無比，唔應該有過熟情況。而今日最體現到呢樣嘢嘅係帆立貝刺身，外脆內軟，相當高質。其他嘅天婦羅，例如鰻魚同廣島蠔水準都唔錯。 天婦羅當然配飯係最好，但係今晚配嘅冷烏冬水準非常高，又易夾又有彈性，絕對可以一試。特別要講一個外加嘅明太子魚餅，係幾好食，明太子同魚餅嘅味道好夾。 有時就係咁，夜晚百幾蚊一個人，幾好食，唔趕人走，已經係恩賜。 #黃埔美食 #hkfoodies #afterteaandwine #茶餘酒後
我間中都會當佢係飯堂。 位於將軍澳中心嘅”樂天皇朝”，係好多附近街坊同工作人士嘅飯堂，喺未有咁多分店之前，佢已經係五顏六色小籠包嘅始祖。 唔知係咪飲食業難做，近年開始有不同嘅優惠keep住做。例如係下午茶有5折/6折(平日/假日)，有時又做晚市特價，好似最近就做食滿$100加$10有六隻叉燒小籠包。 佢嘅小籠包係OK嘅，又薄又多汁，印象中黑松露味係驚為天人，今日食嘅叉燒味就還算好。但係我最鍾意嘅係佢嘅鮑魚炒飯，非常入味，基本上我每次嚟都會叫。 其他就standard嘢，海蜇同蒜香排骨都可以試吓。佢啲主菜份量都唔細，要就住叫。 最後要留意佢個前菜同茶都要收錢，其實埋單個base銀碼都唔細。 #將軍澳美食 #hkfoodies #afterteaandwine #茶餘酒後
鮮選又摺，睇嚟呢間Hama Sushi都唔擺得幾耐… 雖然Peak hour仲係要排隊，但人數同對面比真係差好遠。 食物質素更加係每況愈下，除咗拖羅叫還可以，其他壽司好多都整得求其咗，特別係新出嗰啲咩咩火山，就似係用剩嘅食材堆砌出嚟。當然想平平哋當爭鮮食嘅話，仍然係可以嘅… 其實我個人嚟講唔係好想壽司郎一個獨大，但係冇辦法，元氣爭鮮我唔鍾意，鮮選hama不成氣候，做唔到競爭對手，實在太可惜。 #佐敦美食 #hkfoodies #afterteaandwine #茶餘酒後
一間coffee shop，最忌唔係食物麻麻，而係坐得唔舒服。 位於廟街嘅”Studio Caffeine”，人氣爆棚，周末來午餐要等位是理所當然。不過，呢間coffee shop嘅座位安排就認真麻麻。過份擠迫，通道窄，二人座和隔離太近，根本就係搭枱，坐得相當唔舒服。 更要命的是，餐廳出品偏慢，落單後25分鐘才有咖啡 (30分鐘才上正餐all day)，而座位隔籬就係廚房，洗碗聲不絕於耳。可以話，嘢食未上我已經對佢印象相當差。 其實，餐廳的咖啡出品很好，甚至說是近來最好的latte也不為過。至於不同種類的all day，用料亦有不同。美式全日早餐啱晒大胃王食肉獸，連炒蛋都比起超級全日早餐來得大。而超級全日早餐就有蔬菜生果，比較平衡。(隔離枱的egg benedict看來都好有水準。) 食物質素算是非常好，配料都熱辣辣，炒蛋、腸、牛角包，比不少Cafe都做得好，而且份量絕對對得住價錢。 不過，坐得唔舒服嘅咖啡室，始終係硬傷，我就唔會再嚟了。 #佐敦美食 #hkfoodies #afterteaandwine #茶餘酒後
其實呢間火鍋我嚟過好多次，冇計，要就返舊同事放工… “滾得囍宮廷火鍋小炒”，可以話係北角名店。宮廷式嘅火鍋佢差唔多係始祖，不過平日嚟到都係冇咩人😅 可能一般人會覺得一個靚靚嘅湯底加啲肉已經唔平。 但係佢而家做緊優惠，全單-200再九折，另外會員生日有支白酒送，我又用埋之前儲落嘅積分換西班牙豬肉，最後5百幾兩人就落到樓，真係超級平！ 食物方面，佢個花膠雞湯真係好豐富，又好飲，絕對唔差過嗰啲所謂雞湯嘅始祖。豬肉就正常地好食，而我覺得佢啲餃同丸都做得唔錯，每一款都有啲特色，響鈴亦都相當有水準(所以我次次嚟都會叫)。 嚟呢度最緊要係留意佢啲優惠，可以同啲咩一齊用，同埋記得儲積分，咁樣就可以maximize餐飯嘅性價比！ #北角美食 #hkfoodies #afterteaandwine #茶餘酒後
當一間沿海法國餐廳可以包場，今晚嘅體驗一定唔會差… “Bistronomique”，西環嘅French，已經想食好多年，原因係menu嘅嘢係幾authentic，好耐冇見menu同時有馬賽魚湯、洋蔥湯同紅酒燉牛臉牛尾了。 牛肉他他係有驚喜嘅，明顯佢係他他之外落咗好多配料，夠味又夠嚼口，好接近法國小餐館水平了。湯其實我掙扎咗好耐，最後揀馬賽魚湯，因為比較少地方有，最後亦都冇令人失望。 Main嘅兩個dish就揀咗紅酒燉牛臉牛尾同黑松露羊肚菌鵝肝煮白鴿。牛臉牛尾非常林，亦都非常入味，感覺上仲好食過當地Alsace嘅出品，不過蔬菜煮得太大粒，而且唔似係一齊燉。鵝肝煮白鴿我會認為係ok，白鴿有slightly overcooked，其他配料正常發揮，唔好同米芝蓮嘅法國餐廳比了。 甜品嘅creme brulee係可以嘅，不過plating就… 最後講講服務。侍酒服務係幾唔錯，醒酒認真，用燈光照住decanter慢慢倒酒，以HKD 150嘅開瓶費，算係幾好了。今晚得我哋一枱包場，對住海邊食，其實食物質素已經唔太重要。 #西環美食 #hkfoodies #afterteaandwine #茶餘酒後
今日經開旺角，想搵間有啲特色，價錢又合理嘅Cafe，就搵到勝利道嘅”Epoch Bistro”。 原本有啲驚會遠，但原來moko經天橋行約6-8分鐘就行到，算係幾方便，我哋仲喺食之前行吓附近啲寵物店。 餐廳間隔令人坐得好舒服，同隔離枱隔得好開。好多人都會叫石燒，但聽到今晚有BBQ Chicken酸種pizza (HKD 168，醬汁好香，呢個好好食)，就叫嚟試試，另外仲叫咗慢煮羊膝 (HKD 168，慢煮煮得好腍，醬汁入邊有薄荷味)，同樣地係貪佢哋比較特別，同價錢合理。 另外，小食就叫咗個煙三文魚羽衣甘藍沙律同蒜片蝦多士。沙律外型唔錯，味道都正常。蒜片蝦好新鮮，多士就可以用嚟點嗰啲蒜香油。 嘢飲就叫咗菠蘿海鹽梳打同青瓜青檸梳打(大杯HKD 48)。杯青瓜青檸梳打嚟到真係嚇親，絕對夠食晒成餐飯😂，佢係以好Refreshing嘅青瓜味為主，入邊仲有青瓜碎，唔會好甜，又可以解膩，話係成餐飯mvp都不為過。 嘢食特別，環境舒適，價格合理，真係值得一讚。要注意嘅係佢啲嘢食都幾大份，叫嗰陣要小心叫得多得滯😅。 @epoch_bistro.hk 何文田窩打老道67E號怡景大廈地舖 港鐵旺角站D3 出口, 步行約10分鐘 #旺角美食 #hkfoodies #afterteaandwine #茶餘酒後
仲記得，”鮮選壽司”一出嗰陣係幾震撼。 作為Donki附屬壽司店，好多KOL一開始將佢捧到上天，例如Wasabi係如何新鮮。冇幾耐，一下子就跌落凡間，大量網民認為鮮選名不符實，甚至比爭鮮還要差。 當黃埔店都完全唔使排隊，生意好差，我就知呢個係時機了。 同壽司郎一樣用pad落單同用火車上菜，呢度嘅質素唔算差，最少好過元氣。好多壽司組合都唔貴，35元4舊一set，好抵叫。壽司飯係啡色，即係用紅醋做，比較濃味。魚生水準平均，唔會大驚喜，但一啲都唔失禮。 有時食嘢，就係唔想排隊。排隊店，一樣有機會中伏。不如抱住中立態度幫襯，話唔定可以發掘到好多寶藏。 #黃埔美食 #hkfoodies #afterteaandwine #茶餘酒後
呢啲咁靚嘅croffle，居然係嚟自一間燒肉放題。 將軍澳中心嘅“燒肉男”，由於近屋企，我間中都有食。最近發現佢有中午set，唔使食咁多肉，每人158加一，就去試吓。 一個中午set，有六款肉，可以揀豬牛雞海鮮唔同組合。另包一個飯、前菜、湯同任食甜品飲品。燒肉同海鮮都係正常水平，唔特別驚喜。反而係個croffle，專人即場整，有幾隻味揀，仲可以加雪糕球。 外面食一個croffle都三幾十，我就食咗4隻😂。真係妹仔大個主人婆，情況就好似附近大將嘅waffle咁。 #將軍澳美食 #hkfoodies #afterteaandwine #茶餘酒後
Tag唔到將軍澳店，惟有tag住之前食過嘅旺角分店先。 不過，雖然都係”得閒飲茶”集團，但位於將軍澳澳南海岸嘅”DHYC Dimsum Restaurant”，無論嘢食同環境都係走另一個路線。 環境大有充足自然光，open area，pet friendly，室外都有梳化座，而且梳化座都歡迎寵物，甚為難得。 唔係淨係個餐廳名有英文，Menu入邊有紅白汽酒，所以餐廳都有外國人幫襯。 食物方面會比其他分店更特別精緻，例如鵪鶉蛋燒賣嘅鵪鶉蛋係釀喺粒燒賣入邊，焗叉燒包同蝦多士水準都好高，絕對高過一般酒樓。 As return，佢嘅價錢比出邊貴三四成係基本。茶錢令人困惑，15蚊一位只係得普洱，轉香片壽眉鐵觀音要另加12-15一位，實在非常誇張。 不過見到成堆柴犬玩得咁開心，幾個寵物家庭有講有笑，有時貴少少都值嘅…對嗎？ #將軍澳美食 #hkfoodies #afterteaandwine #茶餘酒後
呢間嘢，多數冇咩人去，但間中多人到要排隊… “穴之酒販”，係將軍澳中心嘅日式餐廳。相比附近幾個車站商場，呢個商場係比較能容納中價而有質素嘅餐廳。不過呢間LUBUDS旗下嘅居酒屋，晚市直程可以用高價形容。所以晚上一向冇咩人，我一度懷疑佢仲可以做幾耐。 但係佢午市係幾吸引，一個full set lunch百幾到二百幾 (住戶有95折)，表面唔算平，但刺身新鮮無比，部份用料更是矜貴。串燒水準都遠在平價居酒屋/放題之上，食完係好滿足嘅。 順帶一提，晚市呢度就賣”飛機貨”同清酒，性價比就差好遠了。 #將軍澳美食 #hkfoodies #afterteaandwine #茶餘酒後
生日飯(再續)。 位於觀塘區嘅”NATA - Steak, Wine & Cocktail”。又係周街都有嘅意粉牛扒，仲要喺工廠區，咁應該冇咩人啦？ 正好相反，星期一嘅晚上接近full booking，原因何在？ 可能係嘢食幾特別？黑松露意粉相當夠味，牛扒有個火坐住keep warm，梳乎厘pancake也做得不錯，就連一般小食都做得認真。 可能係性價比高？5個大男人，叫咗兩個意粉兩個扒幾個小食三個甜品，埋單1500有找。當然亦都可能我哋帶咗酒去，飲走咗啲quota。當然更可能係大家都老咗，食唔到咁多😂。 Anyway，呢度坐得舒適，唔限時，性價比高，抵佢多人嘅。 p.s. 帶咗支想開好耐嘅英國汽酒去，比好多入門香檳質素更高。 #觀塘美食 #hkfoodies #afterteaandwine #茶餘酒後
生日飯(最正式) 如何評價一間米芝蓮三星餐廳？ 中環“Ta Vie” (旅，法文則解作your life)，佐藤秀明主理，表面上是French，其實用上不少日本食材，包括生蠔、鮑魚和蛤蜊等，盛惠2980+10% 1位，另加酒水，埋單兩位超過七千😱。 要評價餐廳是否值三星，一方面可以看最signature菜式是否驚為天人。例如Amber嘅Aka Uni，唐閣嘅焗蟹蓋，Caprice嘅和牛他他魚子醬等等，都係美食嘅天花板。 Ta Vie卻走另一路線。所有dish都有星級水準，但沒有一個dish是三星水平(petit four和黑咖啡的pairing可算是)，不過有一樣嘢係最強 - 香味 - 所有dish都香到不得了。果然是日本人嘅手段！ Dish方面不逐個介紹了。大約是，蛤蜊Parma ham，羊肚菌鮑魚雞，魚子醬長崎生蠔，燒半熟乳鴿，都係非常厲害嘅世界級菜式。而櫻花蝦意粉一食就欲罷不能。至於petit four更是驚喜萬分。當然，呢餐都有少少缺陷，來自新疆嘅白酒，質素實在麻麻，襯不上星級。 最後要提提服務，是理所當然嘅好，事前溝通足夠(包括我要求換走一道菜😂)，chef佐藤秀明會親自上菜，和跟本人合照，都係理想服務嘅表現 (可能deposit都要二千有點嚇人) 。這個生日，不枉了。 #中環美食 #hkfoodies #afterteaandwine #茶餘酒後
第一餐生日飯。 無可否認，Restaurant week嘅叫座力大不如前，好多好抵嘅餐廳已經冇咗，就算有，個Menu都唔吸引。 不過今次左計右計，就搵到”Pirata”，灣仔嘅意大利餐廳。3 course，包鮮刨黑松露意粉，都只係198。平時淨係呢個意粉都268! 呢個意粉，要講多少少。佢係用Tagliatelle，即略闊嘅麵條。呢個同白松露之都Alba常用嘅麵條Tagliolini有少少分別。所以今日呢度嘅汁會比較結身，令較為闊身嘅麵條都可以掛到汁。呢個麵條雖然唔夠傳統，但仍然非常好食，係mvp。 除此以外，Truffle Tartare同燒小牛連吞拿魚醬都係唔錯，餐廳環境氣氛都唔錯，不過set冇嘢飲，就爭少少。但呢個價，可以完全接受。 #灣仔美食 #hkfoodies #afterteaandwine #茶餘酒後
台北 (cont. 2) 中午喺台北車站附近行完街，食好抵食嘅”這一小鍋”，食完飽到傻，夜晚都唔使食😅。 跟住入去北投，去其中一間比較靚嘅”北投麗禧溫泉酒店”。房中有兩個浸池不在話下，最癲係免費minibar同廁所用品。其中洗面膏都分男女，連美白mask都有提供，太誇張。 #台北美食 #hkfoodies #afterteaandwine #茶餘酒後
台北 (cont’) 排咗個幾鐘嘅米芝蓮”阜杭豆漿”，其實還好，咸豆漿、夾油條等都係有特色嘅，但試一次就夠了… 來到淡水，試吓個”麻吉奶奶鮮奶麻糬”，先知原來個麻薯係凍嘅，個人比較鍾意熱食🙂。 再去到漁人碼頭和情人橋行吓。 最後去”石研室”食炒火鍋，相當平又好食，又可以任拎配料，如果喺台北車站附近係唔錯選擇。 #台北美食 #hkfoodies #afterteaandwine #茶餘酒後
台北，day 1。 第一間去了如同身在日本的”MATCHA ONE”，食非常誇張的抹茶甜品！但必需預約，而且必需坐到窗邊才有feel。 夜晚就打邊爐。台式火鍋已經有太多過江龍喺香港，所以今次去未做過江嘅青花驕。其中綜合滑、酸白菜鍋和茶為MVP，但肉則比無老鍋、湊湊鍋略遜一籌。 #台北美食 #hkfoodies #afterteaandwine #茶餘酒後
唔算好authentic嘅西班牙菜，有乜可取之處？ “Rojo”喺炮台山嘅內街，平日可以幾乎坐無虛席。首先佢係sell set dinner，平日5百幾兩個人，開價相當保守。套餐已經包5個tapas、1 main 1 dessert。除此以外corkage也只是150，同樣保守(就算加一枝house wine都只係收138)。 食物方面，沙律其實好港式，其他tapas還好，但和正統Spanish有距離。Paella倒有驚喜，海鮮多到不得了，飯亦非常入味。 餐廳氣氛同環境都唔錯，兩人可以坐四人檯的話算是很舒服，加上唔會限時限後，overall係幾好的。 #炮台山美食 #hkfoodies #afterteaandwine #茶餘酒後
將南都未必係間間都係貴餐廳。 海天晉匯入面嘅”越式Pho車頭”，算係比較平民嘅美食。一個set dinner一百有找，就有火車頭河粉同越式咖啡。唔好睇佢外貌平凡，咁係因為屋企人要食”全走”嘅效果😅。越式咖啡就十足少甜嘅G7… 另外小食如串燒同蝦餅都正常發揮，月尾食都起碼唔會覺得肉痛😅。最後要講講佢有室外座位，方便帶寵物嘅客人。 #將軍澳美食 #hkfoodies #afterteaandwine #茶餘酒後
行經鰂魚涌，如果係平日下午，我都會去一去One Island East 37樓嘅”Public”。 呢個蛇王勝地，下午3點後，一杯抹茶latte，25蚊，送無敵海景一個，兼且冇乜人，好悠閒。 嘢食就唔知了😅 #鰂魚涌美食 #hkfoodies #afterteaandwine #茶餘酒後
唔知幾時開始，鐵板燒變到咁刁鑽。 銅鑼灣“虎鐵鐵板燒”。 食鐵板燒，通常就係睇食材。一個set，有冇齊四大食材？(鮑魚/龍蝦/鵝肝/和牛) 而呢度係齊晒，幾好。 同好多現代嘅日式鐵板燒一樣，除咗要師傅功力深厚，整得好食，最重要係plating。所以鉄人旨花、海賀、御鐵都係行呢個路線。而呢度，四大食材都做得唔錯，特別係鮑魚同和牛。 不過佢嘅環境相對就一般，幾rustic嘅工業風，冇頭先講過嗰幾間鐵板燒嘅環境咁優雅自然，景就更加唔使講。 #銅鑼灣美食 #hkfoodies #afterteaandwine #茶餘酒後
獵奇。 彩虹站出邊嘅牛池灣村，出邊有各式各樣嘅攤檔，街市檔。食方面就食燒鵝嘅”新志興”。不過今日嚟到未開門，就去咗更有上一代茶樓特色嘅”新龍城茶樓”。其實我細個住過一段時間彩虹，但係都未嚟過呢頭😅。 “新龍城”同而家嘅茶樓一啲都唔同，冇環境(甚至係差)、冇服務，加水要自己去滾水間，所有點心要衝出去搶先有。不過另一方面睇，呢啲咁有特色嘅茶樓已經好少。 點心方面，基本上一出就好多人排隊搶，雖然好麻煩，好迫，而且好危險，但好處係唔使tick點心紙之後等，一拎就食得，非常滾熱辣！另外有煎炸部煎糕同腸粉。 最好食嘅分別有 1.煎腸粉 (驚人嘅香脆感) 2.鵪鶉蛋燒賣 3.鴨腳扎。如果只係以食物論，並唔係咩絕世美食，仲要冒着周圍滾水濕地嘅危險衝出去搶，加上烏蠅同冷氣機滴水，真係對環境有啲要求都唔好入去。 不過呢度嘅氣氛就有着難以抵抗嘅魔力，周圍搭枱嘅食客都係笑容滿面，鬥搶完點心之後互望而笑，總算係一種另類體驗。食完，都係好滿足嘅😅。 要注意佢嘅點心只係出到2點鐘就冇晒。 #彩虹美食 #hkfoodies #afterteaandwine #茶餘酒後
星期五休一休。 其實我間中都會食將軍澳間”Simply life”。雖然佢好多缺點。偏貴，部份座位有啲迫，不過佢有啲嘢食份量幾夠，例如all day 。而且我幾鍾意佢嘅燈光同氣氛，同埋七點幾好多時都唔使等位😂。 今晚再去發覺冇咗all day，就叫prime ribeye同羊架。ribeye係燒得好炭香，薯條都幾好食，不過ribeye凍得好快，配上四成燒同麻麻哋嘅肉質，其實幾難咬得開…羊架中規中矩，但個汁唔夾，薯蓉水平比預期差。 唔連set散叫冇嘢飲，埋單都過600。睇嚟係我最後一次食了。 #將軍澳美食 #hkfoodies #afterteaandwine #茶餘酒後
午餐光顧觀塘”T Club”。 熊仔凍奶茶，all day，表面上普普通通，但有view嘅觀塘餐廳唔多，又唔貴，休息吓，一流。 #觀塘美食 #hkfoodies #afterteaandwine #茶餘酒後
今日天氣好，食個好啲嘅lunch。 位於Ritz Carlton 102樓的”Tosca Di Angelo”應該不會陌生。雖然已經是米芝蓮一星的常客，但我發現香港好少人識食南意大利菜 (仲要係西西里)。呢度嘅主食其實唔係意粉，而係意大利南部嘅海鮮。 講起意大利，其實Tosca Di Angelo本來係肥佬Bombana (即三星8 1/2)主理，但當然因為沒有時間，就推薦給徒弟Angelo Aglianó。 今日食set lunch，當然會Focus其海鮮。紅蝦意粉可說是一絕。鱈魚也是非常新鮮，汁煮得很入味。牛都有水準。當然Tiramisu是所有top Italian都不會失手的。除此以外，服務都是頂尖。點麵包的意大利黑醋也有很多選擇。 晴朗的一天，再飲杯Campania的白酒，對住外面景色。這，才是生活。 #九龍站美食 #hkfoodies #afterteaandwine #茶餘酒後
又玩啲特別嘢。 眾所周知長沙灣有兩間蛋撻店，長期排隊，各有支持者。一間係”新華茶餐廳”，另一間係”金園茶餐廳”。今次一次過試晒兩間，容易啲比較兩間嘅分別。 先講蛋撻。港式蛋撻一向分曲奇皮同酥皮。而呢度兩間茶餐廳都主力做酥皮，而曲奇皮只係佢哋”副牌” (甚至買唔到)。”金園”嘅酥皮蛋撻流心效果明顯，有一定蛋香，蛋漿相當滿，酥皮比較鬆散同油膩。”新華”蛋漿做得比較實在，甜味比較明顯，酥皮亦都比較實在。我同屋企人各自鍾意一間🤣。 其他嘢食如下: 奶茶: 金園無論奶香茶味都比較濃。新華則飲得舒服 沙嗲牛肉麵: 兩間都正常，新華牛肉完整啲 奄列: 金園嘅火腿絲分布平均，但好油。新華少油啲，比較似平時食到嘅茶記奄列 感覺上，兩間餐廳嘅方向好consistent，”金園”嘅嘢食比較濃味但油膩，”新華”就比較平淡清新，難怪各有支持者。 #長沙灣美食 #hkfoodies #afterteaandwine #茶餘酒後
琴晚嘅公司飯局，去咗筲箕灣”漁家海鮮大排檔”。 呢度主要食海鮮，唔好睇我影到啲蟶子同條魚啱啱巉巉咁，由於係同啲老總食飯，咁冇理由等我影埋佢哋先食得㗎嘛😂😂 最好食嘅係炒蟶子、日本糖心鮑魚、雞肝等 另外呢度開瓶費50 ，隔籬枱都帶咗支Pontet Canet 去開，我哋呢枱就飲中式白酒😂 #筲箕灣美食 #hkfoodies #afterteaandwine #茶餘酒後
原本琴晚出，但琴晚出嗰陣IG死咗，成個post冇咗🥲 而家再寫過。 個個都寫restaurant week，我都寫埋一份。 鰂魚涌”La Favorita”，dinner HKD 438pp 呢間Classic Italian係鰂魚涌名物，要去到濠豐大廈嘅扶手電梯上去。雖然今晚冇叫酒，但無論裝修同氣氛，都十足舊式歌劇院嘅小餐館咁，好經典。就好似幾年前喺意大利北部Piemonte嘅Alba，呢個白松露之都食佢酒窖下邊嘅餐廳一樣。 食物方面都係黑松露他他最突出，車輪意粉就正常傳統，Tiramisu就有啲港式，冇想像中咁好食。不過淨係去感受吓氣氛都唔錯。 #鰂魚涌美食 #hkfoodies #afterteaandwine #茶餘酒後
喺將軍澳廣場，見到壽司郎排長龍，只能望門興嘆，食另一間”峰壽司”。 唔好睇小佢係屋村壽司，以前”峰壽司”係有中檔水平，喺元氣元綠之上。雖然而家沒落咗，但佢嘅”辛辣龍之卷”仍然有當年風味，而佢啲長壽司喺香港已經買少見少。 冇咩要求，間中食吓，還可以。 #將軍澳美食 #hkfoodies #afterteaandwine #茶餘酒後
今日想食crepe(可麗餅)，但偏偏唔去ODelice，去觀塘成業街食”Bubble Tree”。其實成業街嘅餐廳 (包括成業/成運大廈)一向換完又換，但呢間Bubble Tree就係長春樹。 佢最出名嘅漢堡扒蛋包飯，有幾種和牛可以揀。食落油脂感強，有啲似Pepper Lunch，其實係唔錯嘅，仲未計佢只係收茶記嘅價錢。Crepe幾清新，冇特登做太多調味，香港人可能會覺得太過清。 個人最不滿反而係啲甜品。30蚊心太軟或waffle連雪糕表面上價錢無敵，但食落口粉感好強，心太軟十足買現成返嚟叮嗰啲。Waffle都係，甚至唔及街上買到嗰啲。 由於唔收加一，佢一般嘅服務，我接受到，雖然佢成日同隔籬枱搞錯送嚟嘅嘢食… 餐廳嘅定位同定價其實冇問題，我只係覺得係俾啲食評呃咗… #觀塘美食 #hkfoodies #afterteaandwine #茶餘酒後
講咗幾年終於食到。 尖沙咀有兩間”香香宮煮”，都係宮廷式火鍋，同北角嘅滾得囍一樣。由於屋企人想試冬瓜盅，就冇叫到佢最signature嘅花膠雞湯。 整體嚟講，食物中等以上。本地手切肥牛雖然有牛味亦都有嚼口，但冇咗肥牛嘅油脂感。所謂即炸響鈴，雖然鬆脆，但太細件，同契爺鮮入圍煮冇得比，更加唔使提101手工。黑松露餃都唔及其他同類型火鍋店好食。 反而佢嘅貴妃蚌象拔蚌非常新鮮，瑤柱滑都有水準，整體嚟講都未至於得個影字，不過一定冇其他人講到咁神。 #尖沙咀美食 #hkfoodies #afterteaandwine #茶餘酒後
有啲餐廳，表面貴，其實性價比唔錯。 Popcorn嘅”Espresso Alchemy”，食過幾次。如果淨係喺門口睇Menu一定會覺得貴，但真係食過會發覺佢有啲有優點。 首先佢唔收加一，可以自己斟水，紙巾餐具都可以自己拎。 菠蘿雞Burger雖然收126，但好大份，有兩大塊雞。 煙三文魚碎蛋三文治，只收86，大份到食唔晒。 抹茶latte就普普通通，奶味太多抹茶味太少，不過咁啱有中信信用卡就可以免費加大。 #將軍澳美食 #hkfoodies #afterteaandwine #茶餘酒後
Weekend一早，突然間想食印度嘢。 由於工作關係，我係識相當多印度人，其實佢哋比較鍾意啲印度小店。不過今日食間大路啲嘅，下次先介紹小店😂。 喺北角有間米芝蓮級嘅印度菜，”羅勒印度餐廳”，喺B4出口，仲近過祥發。一般印度會食嘅嘢佢都有，餐牌好大本，lunch set又有其他玩法。 不過無論叫咩咖喱，我都一定會叫Mango Lassi。襯埋Chicken Tikka、黑松露烤餅 (其實黑松露係噱頭，我比較鍾意叫garlic) 等，基本上就係叫得最多嘅嘢食。如果人多，通常就會叫埋Pani Puri。 不過講味道，我覺得Dilliewale、JoJo同我啲同事鍾意嘅皇子都好食啲，性價比亦都高啲。 米芝蓮嘅嘢，我真係識條鐵。 #北角美食 #hkfoodies #afterteaandwine #茶餘酒後
呢盤綠色飯係乜東東… 深水埗鴨寮街附近有兩間差唔多名嘅馬拉菜 - 叫”捌哥捌哥”同”蘇媽蘇媽”。其中蘇媽人氣高啲，好多人排隊，就去咗捌哥。 其中呢個綠色飯叫Nasi Lemak (辣死你嗎)，即椰漿飯。又唔係好貴，不過用料味道普通。個海鮮喇沙ok，不過我唔食洋蔥😂，其餘春卷、咖央多士，普通水平，要搵間好食過佢嘅唔難。 Overall一般般，喺附近可以試吓，唔使專程嚟。 #深水埗美食 #hkfoodies #afterteaandwine #茶餘酒後
好少入到屯門，原來都係美食天堂。 就算喺V City，都可以搵到一間”老虎冰室”。原本想食超邪惡西多，但諗諗吓都係食影相嘅”二世祖西多” 😂。另外，鰻魚蛋包飯都只係70有多，平過絕大部份嘅Cafe。芝士蝦多士熱辣辣，非常惹味。 跟住行咗去食”嘆甜品”，叫一個算係平民嘅waffle。舊式甜品店樣，waffle有好多味道，感覺上食情人味多過waffle本身。 商場區同屋村區真係兩個世界，嚟到呢度想食幾平幾貴都得。 #屯門美食 #hkfoodies #afterteaandwine
今晚玩啲奇怪嘢。 又經柴灣，今次終於食到傳說中嘅”新桂香燒臘”。呢度嘅叉燒係非常出名，出名貴！幾貴？一斤盛恵208！呢個價已經冠絕香港所有燒味舖！ 但係轉個角，見到另一間燒味舖”阿爺燒鵝”仲多人排隊，而且佢高級版叉燒嘅”肥叉燶邊”一斤都只係148！一於買晒兩間嚟試吓😂😂。 結果，居然比預期一面倒。阿爺燒鵝嘅叉燒夠晒肥夠晒燶，但係瘦肉嗰部份唔夠淋，同新桂香明顯有段距離。新桂香嘅叉燒真正肥瘦均秤，淋到好似軟墊，係真正做到酒店級叉燒水平。我唔敢話佢抵食，但佢係俾得返相應嘅質素。 By the way，香港最好食嘅叉燒，始終都係天龍軒。 #上環美食 #hkfoodies #afterteaandwine #茶餘酒後
同裝修得靚靚嘅人氣cafe相比，我都係比較鐘意平民屋村cafe。 先唔講而家嘅新式cafe枱凳都好細 (一排過嗰隻已經係主流？)，坐得好逼，跟住一杯普通咖啡50起跳就係為咗影兩張相，有啲再收加一。 今次行過將軍澳尚德商場食lunch，”1968 Bistro”。 看那法國小菜館常有嘅油封鴨髀，連熱飲只係98，冇加一，我轉了cappuccino都只係加6蚊。餐廳有啲位係open area，可以慢慢坐。 當然啲裝修同嘢食都幾rustic，連Odelice!都比唔上。但有時所謂嘅chill，係心靈感受而唔係裝修。 #將軍澳美食 #hkfoodies #afterteaandwine #茶餘酒後
行過九龍灣，又唔想食德福，行遠少少去到Eastmark。 Eastmark上面有一堆唔同style嘅餐廳，但沒有一間有”大渣哥茶記”嘅名氣。 曾經係黃店首選，佢嘅幻彩詠西多、焗炸彩脾、黑牛黑麵都好有名。如果未試過，都可以試吓，尤其黑牛味係同其他茶記唔同，顔色同味道都更濃。不過佢嘅價錢比一般茶記高，一個下午茶閒閒地5、60元。 #九龍灣美食 #hkfoodies #afterteaandwine #茶餘酒後
將軍澳中心最新嘅超級人氣店，並唔係已經好長龍嘅”Beans Bakery”，亦都唔係開放式嘅”Table”，而係本來就已經有分店嘅”SOYmart by豆乳狂人”。 全部嘢都係豆製品，連奶茶都係用豆漿做。抹茶豆漿嘅味比預期濃郁，至於普通豆漿就比較杰身。小食方面，鹹蛋黃豆卜同芝士豆腐各有特色，不過都只係陪襯品。 #將軍澳美食 #hkfoodies #afterteaandwine #茶餘酒後
又平又chill嘅coffee shop，買少見少，越嚟越貴就有。 嚟到坑口TKO Gateway (即前厚德商場) 嘅”Coffee Break” 好耐冇食fish and chips，就叫嚟試吓。新鮮香脆可口大份，下午茶七十幾仲包飲品，性價比真係高。 #將軍澳美食 #hkfoodies #afterteaandwine #茶餘酒後
終於食到呢間人龍店，太古城”座銀”。 雞白湯非常濃，可以說是香港最濃的雞白湯。雞肉都好嫩，有雞味。 但有兩個問題。一是冷氣太凍，直頭是趕客級的溫度。第二是太貴，一個麵，連加一，足足163😱 。午餐都可以吃3 course了。 #太古美食 #hkfoodies #afterteaandwine #茶餘酒後
銅鑼灣有間手工意粉，唔貴，有靚嘢飲，仲要係free corkage。 “Vol.1 Cafe” 龍蝦汁意粉、牛肋條意粉、白松露雞翼，各有特色。抹茶奶蓋士多啤梨牛奶，更加係一嚟即影。 當然最好飲都係自己帶去嘅紅酒😂 #銅鑼灣美食 #hkfoodies #afterteaandwine #茶餘酒後
食貴價台式嘢係咩感覺？ 銅鑼灣世貿中心入面有好幾間食過嘅餐廳，雖然菜式唔同，但共通點係Premium都好高。好似呢間”臺北棧”，三人食分分鐘過千。 咪睇佢啲滷肉飯只係68蚊，其實好細碗，要係咁加其他小食。海鮮面蛋餅係幾特別，鹹蛋芋球就幾好食嘅，反而主角嘅滷肉飯反而唔及台灣啲街頭小食。 原來所有嘅錢都去晒裝修。非常柔和嘅音樂同極chill嘅彩光、梳化和遊艇景，可以隨意enjoy一個下午。有啲人坐喺海邊直程瞓着咗😂。 #銅鑼灣美食 #hkfoodies #afterteaandwine #茶餘酒後
鰂魚涌，西日cafe”幸圓”，呢區嘅名店。 英皇道1001號上面有好多嘢食，其中一間就係入門口上電梯已經見到嘅”幸圓”。 作為一間西日Cafe，佢嘅main比較日式 (特別係lunch set)，但係飲品同甜品就純西式。 雖然啲魚生好新鮮，牛肉飯都好食，但點都要叫一個打卡嘅甜品同飲品先得😍。 #鰂魚涌美食 #hkfoodies #afterteaandwine #茶餘酒後
去到北角”古月”，一間米芝蓮的必比登推介。 原本覺得米芝蓮鬼識食呢啲東南亞菜咩，好大機會又中伏。 點知佢真係幾好食😋。 頸青豬飯，魚露雞翼，三色奶茶，全部都帶點驚喜。 可以再嚟。 #北角美食 #hkfoodies #afterteaandwine #茶餘酒後
行吓Airside，食”京都勝牛”。 想當年剛剛有吉列牛的時候，價錢相當高，千千聲。現在已經接近平民美食，百多元就有一個set，而且飯菜湯任加。 可以額外request燒板自己整熟多少少。而意外地，翼板牛比西冷好吃不少。 #啟德美食 #hkfoodies #afterteaandwine #茶餘酒後
喺黃埔有幾間打邊爐係出名嘅，其中厚福館算是三幾年新晉，而呢間”契爺鮮入為煮”就更加新，只是舊年開的。不過有YouTuber吹捧，就試吓。 花膠雞湯據稱係老細多年配方，甚至是鼻祖，質素比厚福館高，不過有時頗咸。響鈴最抵食，48就有自家制八件。羊架肉才最特別，平時一件件的西式羊架用刀片成羊肉片，相當不錯，但比牛更貴。 #黃埔美食 #hkfoodies #afterteaandwine #茶餘酒後
自從すき焼森同日山興起後，正統嘅關西式壽喜燒而家開到一街都係。今次試旺角”十侍”其實係貪平 (折後給1000兩位)。當然佢又玩棉花糖又多人介紹，所以先去試吓。 質素還好，感覺上鹿兒島嘅和牛比早幾年係靚咗唔少，難怪喺排名上一度超過三大和牛。不過呢度食嘢好趕，如果跟佢嘅節奏食，半個鐘其實已經可以埋單，用嚟慶祝節日唔係咁適合。 #旺角美食 #hkfoodies #afterteaandwine #茶餘酒後